男人永遠有個不解之謎：點解女人咁鍾意買嘢？如果運動會令大腦分泌endorphin令人快樂的話，「濕平」對女人都有類似的效果。Samantha沒有何超瓊嘅身家，又唔似徐子淇咁嫁個有錢人，但遺傳了家母濕平的最高境界──「平買貴着」，最能達到開心的效果。
要執筍貨，就要好似屋邨師奶咁熟識街市行情，以防俾人搵笨。市好時，零售商會在新年後清貨大減價，今年減價來得特別早，不過細看之下，折後價與目標價仍有一大段距離。近日零售股趁升市拾級而上，但看人流和清貨速度，難予人信心入市。
好似百麗（1880）已升近2011年7月高位，「鞋王」業務廣泛，擁有Staccato、Millie's、Joy & Peace等品牌，又做運動服飾Nike及adidas經銷代理，股價抗跌力強，但商家精，港女都唔笨，要不劈價守住毛利率來清貨，從而縮短存貨周轉天數，在這個市道並不容易，零售市道尚未復蘇，百麗要突破18元看來要加把勁。
Samantha
本欄逢周一、三、五刊出