「我選學生會都有千幾票嘅授權，但特首就只有689票，我嘅民意授權仲多過你（梁振英）呀！」上月中立法會的公聽會上，有「社運女神」之稱的學聯成員何潔泓直斥行騙長官梁振英無民意授權，短片至今錄得近3.3萬次點擊率。近年一班90後青少年變成社運鬥士，何潔泓對社會發展的想法，亦說出了同代人心聲。
記者：吳淑義
「我係何潔泓，英文叫Willis，1991年出世，係公屋居民，家境算係窮，讀中學嗰陣要做兼職掙錢，一直鍾意行街睇戲食飯，自認係好普通同好無知嘅港女。會考成績好，令我可以升讀保良局莊啟程預科書院，18歲嗰年（2010年）發生反高鐵事件，嗰陣就嚟要高考，但都逃學去參加集會同苦行，因為我覺得呢件事真係好緊要。
發展新界東北係大話
從此以後我就踏上社運路，唔再政治冷感，睇咗好多好多新聞報道，於是我喺度諗，點解一定要鏟平菜園村？附近都有軍營，點解唔先鏟平軍營？根本冇廣泛諮詢過，𠵱家嘅新界東北計劃又係翻版。
梁振英話新界東北係單純嘅新市鎮計劃，我認為佢講大話，因為嗰度有個蓮塘口岸，又有公路可以畀兩地交流，仲話有免簽證區域，邊會係普通新市鎮？
其實新界東北應該係港人嘅後花園，呢度有全港兩成嘅有機農地，當大家怕內地菜好多農藥，仲有本地有機菜可以揀，呢度亦有麵包工作坊，話畀大家知買麵包唔一定要幫襯大財團。當我哋唔想過城市生活，可以入嚟耕田自給自足，平日亦可以嚟郊遊，呢度係屬於香港嘅一部份。
梁振英冇民意授權，佢係一個冇誠信嘅人，好識用語言偽術呃香港人。有啲人話畀次機會佢，等施政報告出咗先，如果咁都講得通，咪等於將國教科推咗先，如果唔得先撤回，邏輯有問題。佢係小圈子選舉選出嚟，唔使向我哋交代，所以要爭取真普選，特首先會面向民意。
我𠵱家喺嶺南大學讀哲學系，投入社運三年，最大損失係同以前嘅朋友好難溝通，大家嘅價值觀已經唔同。從來冇諗過買樓，所以唔使賺好多錢，過到活就得，未來就希望繼續為弱勢發聲。我仲有個孖生細妹係讀社工系，佢都有參加社運，家人基本上唔反對，當年媽媽仲同我一齊去反高鐵㖭！」
