印度發生嘅強姦案，無日無之，最近發生嗰單，因為嫌疑罪犯手段太過殘暴野蠻，女受害人在新加坡醫院死亡，至成為轟動國際嘅新聞，引起印度全國討論。但仍然有印度傳統男人認為印度年青女子受西化影響，穿着惹火，故此惹來強姦，印度女士應該穿回傳統衣服（即寬長裙），不要穿牛仔褲云云，呢啲說話實在白癡，但事實上又確係「印度國情」，即使在此駭人案件之後，還有一位國大黨議員在民宿強姦屋內女士。
印度如此，信奉回教嘅印尼亦鬧出類似新聞。印尼南卡里曼丹（以前叫做婆羅州）省有一位高等法院法官出席考核委員會答問會，過到關就可以晉升印尼最高法院（Supreme Court），替補八位退休法官空缺，委員問：「強姦罪犯應否判以死刑？」（按：根據現行印尼法律，強姦罪最高刑罰係坐監十五年，謀殺、販毒、恐怖活動罪可判死刑。）六十歲嘅法官Sunusi點會唔識回答呀？點知呢位先生竟然咁樣回答：「強姦犯與受害者可能同樣享受性交，判強姦犯死刑嘅，必須慎重。」此言一出，不少出席答問會嘅議員轟然大笑，後來佢地解釋話：唔相信自己耳朵啫。
印尼女士就覺得一啲都唔好笑，大量公眾要求呢位最高法院法官候選人立即「被除名」，Sunusi法官其後知死，向記者承認，佢嘅失言可能令佢做唔成最高法院法官，但亦為自己辯護，答問會氣氛好緊張，佢只係開吓玩笑，鬆弛吓大家神經而已。是耶非耶，只有佢先至知道，但在回教國家，女人社會地位甚低，則無可否認。
印度、印尼、美國、英國、歐洲、日本、中國之文化各有不同，國情有別，但印度之集體強姦事件，引起國際輿論憤慨，一致強烈譴責強姦犯，則係基於對女權嘅尊重，在呢方面，尊重女權似乎係一個西方概念，而且係西方經歷兩次世界大戰之後嘅觀念，抗拒西化者，是否等於抗拒男女平等？咁深嘅嘢，左丁山唔識，有啲人研讀甚麼文化研究，話要尊重/保護「當地文化」，聽落似乎有啲道理，但是一旦加入「強姦」行為，又如何可以尊重歧視女性嘅國情文化？以此觀之，西方思想霸權無人能擋，不尊重女權者，仲唔係落後野蠻人？