塗黑眼圈、戴上面罩，劉以達化身黑暗英雄——蝙蝠俠，雖然他沒有6呎高，卻將蝙蝠俠米高基頓的嘴形表情模仿得維妙維肖，就算有人肯花$15,000買蝙蝠俠衫，卻又有幾多人肯着住這件膠衫通街走，被焗到汗流浹背變大花面？蝙蝠俠狂迷劉以達就甘之如飴，認為這是上帝早已為他預備。
撰文：余燕儀
劉以達，他是達明一派的成員，亦是電影裏的冷面笑匠，在《食神》扮演夢遺大師、《大內密探零零發》扮保龍一族情報人員，都叫人笑破肚皮，但原來阿達最想扮演的角色，卻是漫畫世界的黑暗英雄蝙蝠俠，自5歲已情迷蝙蝠俠的他，不但看齊所有系列電影，甚至在eBay花$15,000，從美國訂回89年蝙蝠俠造型戰衣，一償多年心願。
膠戰衣焗出水
沒有6呎高的阿達，日前帶同老婆、扮奸角企鵝的朋友Alex和助手踩入將軍澳，趁黑夜來臨變身蝙蝠俠，他親自塗黑眼圈，由老婆幫忙戴上面罩，再穿上黑色披肩，面向牆壁的阿達，轉身時已經蝙蝠俠上身，加埋米高基頓的招牌嘴形，令人拍案叫絕；由於攝記都是蝙蝠俠迷，他提供了蝙蝠俠戰車做道具，上演一幕蝙蝠俠從企鵝手上搶回戰車的激鬥篇，阿達穿上又重又膠的蝙蝠俠戰衣來回奔跑，又向企鵝拳打腳踢，拍完後阿達已汗如雨下，弄花眼妝，大叫：「辛苦㗎！」
情迷蝙蝠俠的阿達，小時候最愛看漫畫，他說：「唔係港產黃玉郎嗰隻，係外國蝙蝠俠、神奇女俠、超人、閃電俠、青蜂俠，我最鍾意蝙蝠俠造型，佢係黑暗英雄，每逢夜晚出動，故事好吸引我，佢出身好慘，雖然係億萬富翁，有次一家三口行街遇劫，父母俾人一槍射死，剩低佢孤苦伶仃。」
最愛米高基頓
阿達被蝙蝠俠的英雄形象迷倒，最愛89年電影《蝙蝠俠》（Batman）米高基頓（Michael Keaton）的造型，他說：「第一集最經典，造型好靚，有日我上eBay網睇吓有乜嘢買，喺完全冇刻意下，俾我見到第一集呢套衫，鬼佬設計得好靚好型，我即刻叫老婆幫我bid，雖然要萬五蚊，但有size揀，我諗除咗古仔（古天樂）之外，好少藝人好似我咁狂熱，但古仔都唔會好似我咁肯捱苦着，因為呢件衫全部係膠又熱又焗，連面具都係，紮住唞唔到氣。」
原來阿達多年前曾買過一套蝙蝠俠衫，但質料和像真度都差好遠，他說：「嗰套平好多流好多，似畀細路仔玩，我着過一、兩次就擺喺膠箱裏面，經過日曬雨淋，𠵱家再攞出嚟睇已經糊晒。」阿達摸着身上的蝙蝠俠新衫，陶醉地高唱《上帝早已預備》，他說：「呢套衫係上帝賜俾我，又正又堅，雖然幾肉赤，但都要買，老婆都贊成，佢話咁辛苦做嘢，應該獎勵自己。」
音樂表達心聲
蝙蝠俠上身的阿達，是否覺得香港需要一位黑暗英雄拯救社會？他說：「扮蝙蝠俠心底裏梗有啲嘢，但睇戲都知做蝙蝠俠好辛苦，警察要捉佢，惡人要打佢，最後為救城市犧牲自己，所以我唔會做蝙蝠俠，反而想學佢伸張正義精神，無論你係邊個，都會制裁你，但我唔會殺人，只係用黑暗形象等奸人怕咗我，唔會出嚟搞事。」
阿達想用音樂宣揚正義，他說：「我最專長音樂，想用呢方面鼓勵中國人，逆境好快過，我覺得𠵱家社會好邪惡，譬如我好唔鍾意講政治，但我都係香港市民之一，見政府搞到咁樣，好似做騷，政策太慢，香港人變咗港燦，樓價貴到全世界都笑，我希望可以用音樂表達市民心聲。」
