中央「一號文件」扶農政策應該就快出台，買落後，買玖源（827）。玖源主打複合肥、化肥及BB肥。集團2012年上半年度純利增長咗46%，到8120萬銀人仔。當玖源全年度純利，都係增長40%，到1.4億銀人仔，預期PE得5倍幾，平過同業平均8倍PE。又玖源PB得0.7倍，相對中化化肥（297）、心連心（1866）及上個星期升到飛起嘅世紀陽光（509），全部PB都過晒1倍，玖源亦係平咗一截。同去年12月30日見報嘅浪潮（596）一樣（兩星期最高升24%），玖源唔起眼，但PE、PB好吸引，就連世界銀行集團旗下「國際金融公司」，都係玖源股東（揸11%）。買玖源，博2012年PE目標，追番上同業8倍，要見0.19元，現價（0.133元）講緊要升40%。
廣南細細注落鑊
廣南（1203）先排發佈2012年度盈警，一則集團少咗好似2011年度負債回撥收益，二則去年人仔升值放緩，滙兌收益大減。呢兩個非業務性收益合共6580萬銀，唔嘢少，廣南純利倒退，情有可原。而股價受業績影響，喺三年低位半浮半沉。呢轉細細注，當廣南係中資落後股咁炒，博升20%到1.24元，未有耐上到NAV兩蚊。
錢雋