【灣仔會展】大寶法王噶瑪巴呢幾日嚟咗香港喺灣仔會展弘揚佛法，圈中虔誠信眾紛紛出動，前晚黃家強同日籍老婆、甄楚倩同囝囝、陳倩揚同媽咪、詹瑞文同小三Amenda、久未露面嘅陳少霞，仲有賭王何鴻燊長房女兒何超雄等都有去到。前日中午兩點幾甄楚倩入場聽經，佢着住一件粗冷衫，透出打底嘅黑背心，但好神心嘅佢一直留到尾，仲同其他信徒聽指示，一齊企前一字排開，向住舞台上嘅大寶法王叩首跪拜。
詹瑞文舊年中被爆搭上人妻同事Amenda，前晚9點幾佢就同Amenda拍拖去到，入場之後佢兩個就搵位坐低，留心聽經，Amenda警覺性好高，發現有鏡頭影詹Sir，立即擰歪面。
到噚日下午，張智霖（Chilam）同太太袁詠儀帶埋囝囝魔童，聯同蔡一智一家出席法王嘅灌頂儀式。阿智個女見到記者影相即匿喺父母後邊，又問點解有人影相，在旁嘅袁詠儀就同佢解釋：「佢哋覺得你得意所以影你。」
採訪、攝影：朱志聰、藍文浩
