有些事情很易做，就如當你聽聞HMV執笠在即，會很輕易的發出一聲歎息：「唉，可惜！」；有些事情很難做，例如一個中佬貿然決定帶晒一家五口搬去肯雅同獅子老虎一齊住。生活，就係在難與易之間兜兜轉轉。
HMV，我當佢係公園多過舖頭，閒逛與幫襯比例大概係10:1。當佢橫空出世於北京道路口時，三層樓都係人頭，DJ播歌帶領潮流，能夠楔到位帶耳筒試聽就直頭係唔肯放手；然後幾年後佢搬竇，搬入漢口道入面，好在仲有兩層樓，開始有電玩又有iPod，不過亦keep住有一個角落播古典嘢，最愛係逢聖誕或哥哥生日時的晒冷專櫃，可駐足良久；再然後幾年，HMV入咗商場，得番一層，大家其實都聞到陣味，所以佢仲能夠變身，雖然由大變細，都好吖，況且佢賣雜誌價錢仲平過書店，絕對可以幫補番CD貴咗個十元八塊。
回憶就係咁便宜，人人有一大堆出賣，唯有冒險故事先值錢，試問家陣香港地越來越多人話想移民，但有幾多個付諸實行？
芬恩係一位英國跑步雜誌嘅作者，當佢太太響4年裏面幫佢「咇」咗3個BB之後，佢突然想試吓自己跑步嘅天份，臨老先嚟練跑之餘，仲舉家搬去跑步之都肯雅住1年。佢勇氣固然大，我認為佢太座嘅勇氣仲大，反而3位豆丁問題不大，係周遭嘅小朋友由白變黑，同埋由有鞋着變赤大腳咁啫。
芬恩近距離偷師兼練習之後，一年之後除咗跑快咗，仲出咗本「我在肯雅跑步的日子」，入面爆咗好多肯雅人跑得快嘅原因，包括食物、瞓覺、搵食同赤腳跑，佢發現用前腳掌跑比起傳統腳踭落地先係更快更免受傷，而赤腳跑就係最自然做到前掌落地嘅方法，芬恩又話肯雅人跑步都有好多係會着跑鞋，但原因只係避免踩石同踩屎。
真相大白，如果赤腳跑先係王道嘅話，波鞋舖仲點樣做生意呢？若果上網聽歌係未來嘅話，咁CD仲要嚟做乜呢？響真相逐漸浮現之時，接受應該好過抗拒。
噚日路過HMV略盡綿力幫襯，買咗一件TEE兩本雜誌，CD呢，憑弔咗兩眼冇掂過。
now TV主持
mailto:[email protected]