【火炭】余文樂、賈曉晨（JJ）、許紹雄同鄒凱光前晚喺火炭拍攝電影《飛虎精英之套票出征》，片中樂仔同鄒凱光係飛虎隊友，前晚劇情講佢哋去到許紹雄開嘅藥房買男性壯陽用品，但當時由許紹雄嘅女兒JJ招呼佢哋，搞到佢哋好尷尬，唔知點向JJ開口。
由於現場吸引好多人圍觀，工作人員不時以手遮擋，點知呢啲行動辣㷫現場一名惡漢，惡漢因為唔滿意被阻，就喺現場發難狂爆粗，更一度想衝入藥房生事，最後由佢嘅朋友拉走先冇事，但樂仔因為被阻拍攝，即時黑面，反而見慣大場面嘅許紹雄表現得最輕鬆。早前喺微博呻拍拖壓力大嘅JJ前晚即使花個幾小時化妝，但仍然憔悴，亦冇乜心情理會出面有人鬧事。
「冇覺好瞓」
樂仔透露之後會拍一場喺鴨店嘅戲，但佢𠵱家又開緊另一部電影《特種救援英雄》，搞到佢冇覺好瞓，佢話：「試過連續四日有兩日早晚早晚咁拍，係怕體力問題，好在劇組就我。」
採訪、攝影：張俊銘
【齊齊投選2012年娛圈風雲人物】
入面粒粒巨星，你想咀佢，定想掟蕉過去？XD
http://bit.ly/ent_2012 （電腦版）
http://bit.ly/ent_m2012 （手機版）