羅永昌執導、甄子丹主演嘅3D片《冰封俠》開咗20日突然停拍，有工作人員話未收到中期片酬，消息滿天飛，有說內地對蕭定一（阿一）老爸蕭若元嘅香港人網成日鬧中共好唔滿意，所以向中宣部施壓。
由中宣部指示廣電總局多加「照顧」蕭若元父子，但凡佢哋有份投資嘅片，攞合拍批文都要特別關注，聽講《冰》片到𠵱家都未攞到批文，有份投資《冰》片7成股份約7,000萬人民幣嘅中盟知事態嚴重，即刻閂水喉叫停工，要先同阿一講數。
攞番錢走人
聽講中盟提咗兩個方案出嚟，一個係阿一嘅一元影視公司全面退出，之前佢投資咗嘅三成錢會全數退還，另一個方案係影片就此停拍，使咗嘅2,000萬就報銷，子丹同王寶強合約轉到中盟拍另一部片，阿一為大局設想，決定自己全退，攞番錢走人。而電影局已暗示下禮拜會發出批文，部戲會聽日開番工。
馮仁昭噚日打畀阿一求證，佢話：「部戲係停咗，因為我同中盟意見分歧，我決定全退出《冰封俠》，但同政治無關，今次係個別事件，部戲呢兩日會開番工。」
撰文：馮仁昭
【齊齊投選2012年娛圈風雲人物】
入面粒粒巨星，你想咀佢，定想掟蕉過去？XD
http://bit.ly/ent_2012 （電腦版）
http://bit.ly/ent_m2012 （手機版）