【銅鑼灣時代廣場】現年47歲嘅谷德昭（肥谷）雖然不時被影到夜蒲及與異性約會，但佢同31歲嘅女友林子萱感情一直都好穩定，兩個人拍拖十年打風都打唔甩。好似前日下晝5點幾，記者發現肥谷孖住林子萱喺銅鑼灣拍拖行街，不過佢兩個就唔似一般情侶咁拖住手，而係行到離行離列，慌死人知道佢哋拍拖咁。
「啱心水就買」
肥谷同林子萱行咗去時代廣場嗰間Ralph Lauren嘅副線Denim & Supply睇衫，一入到舖頭，肥谷就急不及待除低自己件背心，狂試格仔背心同外套，林子萱就喺女裝嗰邊試帽。唔知肥谷係咪擔心自己試衫試得太忘形冷落女友，佢突然間左望右望搵女友，跟住問佢：「啱唔啱心水呀？」林子萱就猛話：「抵喎！半價呀。」肥谷聽到女友咁講，就叫女友：「啱心水就買。」
之後肥谷自己試帽，都有問女友意見，兩個人前後揀咗成45分鐘都未離開。冇幾耐，肥谷發現有記者喺度，佢竟然同女友由秘道閃走咗，拍拖使唔使拍得咁鬼祟呀！
採訪、攝影：徐錦池
【2012年度勁膠金曲頒獎禮】
可能係今年最公正嘅頒獎禮，保證冇內定冇黑幕，快啲去投選你心目中今年最膠嘅歌曲啦！本月20號將揭曉誰是最膠XD
→ http://campaign.appledaily.com/2012awards