韋斯咸近期走低，聯賽跌出前10兼剛喺足總盃出局，但實不足為辱；今返主場鬥由神奇哈利領軍1月未敗嘅昆士柏流浪，同屬英格蘭幫嘅大Sam艾拿迪斯唔會賣賬啩，決取1.92倍主W為全日重心。
前文提過地獄黑仔王約拿芬禾達斯有料蝦唔到佢，翌仗已能梅開二度，賭波無謂放大一場波嘅成敗得失。所以你周中冇捱到朝早5點幾睇波，只睇電視台新聞片未必留意到，韋斯咸喺盃仔對曼聯失12碼之前，慘有球證杜特發雞盲，對拉菲爾達施華禁區內犯手球視若無睹；終輸0:1出局，嬲到大Sam賽後紥紥跳。
返到聯賽主場鬥搶極分都仲係包尾嘅昆士柏，後者近期成為英超新聞球隊，戰績上揚買人又夠豪；但足智彩班揀讓球盤開嘅專家，初步為同開主W1.92倍嘅韋根讓新特蘭平/半，但卻唔俾大家博韋斯咸讓球盤，大家就要小心推敲。
唔俾大家半個盤博一個，可能睇到韋斯咸主場硬淨鬥下游多勝、又可能睇到隊波同昆士柏一樣，其實積極增兵兼後防傷兵問題唔係咁嚴重、又可能睇到上仗鬥曼聯先收起隊長路蘭，同輸緊換走小弟認為今季進步極大嘅防中迪亞美。昆士柏新加盟嘅雷米喺咪咁堅，大家得個估字；我淨係見到上仗昆軍聯賽悶和熱刺，大家客客氣氣，比賽充滿疑點，今場韋咸雖後顧下周中補賽鬥阿仙奴，但信大Sam今戰會下令戰將谷盡，阻止球會首嘗今季3連敗！
再選新特蘭下盤，認同丘仔昨天分析，韋根冇咗一前一後，中堅拉米斯同返非洲嘅干尼，影響極大；博冷等明天阿仙奴作客車仔，小兵上仗鬥史雲斯朝氣復現，車仔主場極頹也讓半/一，不如小敲上季作客也發狂贏5:3嘅阿仙奴冷W。蘋果波神
（下次見報日期：26/01）