【電視風雲】王征入主亞視，全台立立亂，合約藝人近日要強制上洗腦班，曠課便要執包袱，入行逾13年的蒲進，99年在無綫學滿師便於08年過檔亞視，工作四年多已經歷過三個朝代，日前因缺課被炒，蒲進狂插亞視縮骨要藝人做免費騷，寸爆王征領導無方。
撰文：比華利
近年零劇集製作的亞視，對於魔童王維基大搞的第三間免費電視台一旦出現，或面臨執笠危機，揸弗人王征當然要想盡辦法阻止政府發牌，不惜連番出怪招，繼親自率領藝員、亞姐和亞生到政府總部集會，跳馬舞造勢外，最近又強制要合約藝人上洗腦班，違令者統統炒魷。亞視藝人買少見少，知名度不高的藝人為保飯碗敢怒不敢言。亞視以曠課為由，先後叮走戚黛黛、張啟樂、陳綺雯、張紫櫻（車車）和蒲進，五人中較資深的蒲進日前接受本報專訪時大爆黑幕。
細數三代揸弗人
99年第十二期無綫藝員訓練班出身的蒲進，在無綫工作了九年才過檔亞視，最終因缺席洗腦班，令在亞視的四年多演藝生涯急急畫上句號，他直認對亞視有情意結，他說：「我過咗亞視四年幾，頭嗰兩年半到三年係最開心，但呢年幾，自從嚟咗新老闆（王征），我認知嘅範疇下，真係適應唔到。」
蒲進續說：「當年我離開無綫，一心想去第二度試吓，最初去亞視真係好多優點，人工固然好啲，成間電視台都好窩心，同事間好有人情味，仲可以提出自己意見，有商有量，我除咗拍戲之外，又畀我好多新嘗試，做主持同扮嘢。」
在亞視短短日子，蒲進已經歷過無綫舊將何定鈞、台灣旺旺中時集團總裁蔡衍明和現任的王征統帥，蒲進指三朝老闆風格不一，他說：「何生喺TVB過嚟，我咁啱又喺嗰度出身，佢嘅方向員工最易適應，何生係正路嘅電視人，行嘅政策好大路，佢會主動同員工溝通。蔡生接手，最初好擔心，怕佢帶嚟衝擊會翻天覆地，但係做落去，原來啲衝擊係好嘅，佢帶咗《亞洲星光大道》同《香港亂噏》入嚟，真係掀起咗個熱潮。蔡生在位，亞視有好多新嘗試，佢又試過搞全男班主持做婦女節目《男人做晒》，真係好破格，呢股衝擊亦畀觀眾新鮮感。」
輪到王征接棒，亞視風雲變色，合約藝人要頻頻替公司做大龍鳳，蒲進說：「王征試過召開藝員大會，我去到先知係講發牌，又話藝人要上演藝班，發問詳情都冇人答到。」
鬧亞視折磨藝人
王征早前召集旗下藝人去政總做騎呢騷，暗示缺席有機秋後算賬，蒲進當日無奈撐場，他事後仍心有不甘說：「呢啲係我私人時間，反對與否應該係藝人自發，始終嗰日係員工假期，亞視演藝班，既安排記者採訪，又派攝製隊拍攝成節目播出街，藝人出咗鏡就冇騷錢。記得喺無綫時，除咗上藝訓班有津貼，即使扮個路人甲，套劇出街搵到自己個樣或背影都會計騷，拍嘢冇騷錢，叫演員食乜嘢？當我cheap囉，如果演員出咗鏡冇騷計，咁公司長期under show，不如公司只請office職員，點解要咁折磨啲藝人。」
蒲進又炮轟上堂導師未夠班，他說：「如果係教演藝進修，點解上堂冇教俄國戲劇大師史坦尼斯拉夫斯基嘅嘢？」蒲進越講越勞氣，他激動說：「再冇人企出嚟講嘢就好黑暗，已經離晒譜，因為好多嘢已經到咗我底線。」
認硬頸接受現實
蒲進不值戚黛黛、張啟樂、陳綺雯和張紫櫻被炒，他說：「我個心好唔舒服，佢哋都係勤力嘅演員，同佢哋開工有火花，大家拍嘢都好有heart。」最終都成為失業大軍，蒲進說：「我都惆悵同憂心㗎，好彩一路有幫開屋企搞汽車零件生意。被炒後，我都沉澱咗幾日，我開始接受呢個結果，鬼叫自己衰硬頸。」至於未來動向，蒲進不愁出路，他說：「𠵱家靜吓先，唔係吊高嚟賣，呢次真係想諗清自己方向，唔想咁倉卒，再傾新公司，一定要好了解老闆嘅方向，睇吓夾唔夾先，唔係簽嚟都冇意思。」
蒲進（原名蒲茗藍）
年齡：33歲
出道：99年第十二期無綫電視藝員訓練班出身，曾參演《學警出更》、《法證先鋒II》和《賭場風雲》等劇集，08年跳槽亞視，曾演出《香港亂噏》、《男人做晒》和《11點後特區》等，因曠課亞視洗腦班被解僱。
【齊齊投選2012年娛圈風雲人物】
入面粒粒巨星，你想咀佢，定想掟蕉過去？XD
http://bit.ly/ent_2012 （電腦版）
http://bit.ly/ent_m2012 （手機版）