話說美斯去年以91球，破咗德國轟炸機武勒保持了成40年嘅全年入球紀錄，對方即時大讚美斯英雄出少年，呢位後輩當然都好識做，即刻送番件簽名波衫過佢補數。武勒日前收到呢份厚禮，笑到見牙唔見眼，話由世界最佳球員身上攞到簽名波衫覺得好榮幸，仲話會將件波衫擺喺拜仁個展覽館入面畀球迷任睇。