星球大戰紅足30年，成為一代人的集體記憶，七十後阿一特別瘋狂，獲邀合辦首個大型華人「星戰華人網」，又成立「STAR WARS HONG KONG」。家中400件星戰藏品，件件有情，新近與東廣場合作舉辦首個珍藏展，將家中限量及古董珍藏公諸同好。但原來，夢想開玩具博物館的他，早夢想成真，家中房間成為他與太太的私密星戰展場，反而老婆最愛的Hello kitty就唔見影。「大戰」，都可以好甜蜜，視乎你愛上怎樣的人！記者：呂麗嬋
「都市人，生活沉悶，有人鍾意打波、有人鍾意行街，我呢？由細到大鍾意買玩具。最初，只係幾件心頭好，漸漸越買越多，成為一種寄託。對於我哋呢代人，星戰陪伴成長，係我有記憶以來，第一套入戲院睇嘅電影，特別有感情。小時候，見到好多星戰產品，一條電話繩、一個鐵皮公仔，念念不忘。無錢買得個諗字，到出嚟做嘢買番夠本。
我諗，好多儲物狂都係咁煉成，就似童年嘅情意結，係一種心理彌補。2005年，《星球前傳III黑帝君臨》上畫後，六部曲大功告成，特別失落。嗰時我開始着力儲戲入面嘅宇航技工機械人R2-D2精品，佢係少數貫穿六套星戰電影嘅角色，木無表情，但又好聰明，每次主角陷入危機，都係由佢協助脫離困境。見住佢，唔知點解，就已經好開心。
開blog介紹400精品會友
上網研究唔同年代嘅出品，分門別類，越買越多。試過去灣仔玩具街，買到一個好似電飯煲咁大嘅R2-D2公仔，一打開紙盒，見到嗰頂泛起嘅藍光，我已經眼濕濕！七年嚟，儲儲埋埋啲精品，大大小小400幾件，瘋狂到開blog每日介紹一件玩具，講吓佢嘅年份、出處，連載咗足足一年！遇上知音人讚好，可以開心一日。
就連四年前結婚，車頭嘅公仔，我都用上R2-D2同太太最愛嘅Hello Kitty。嗰時，我成日問朋友一個無聊IQ題：你知唔知R2-D2同Hello Kitty結婚，會生個乜?BB出嚟？試諗吓，R2-D2係機械人，Hello Kitty係貓，佢哋嘅愛情結晶，一定係藍白色嘅機械貓哆啦A夢！有啲人可能覺得好無聊，但我太太就笑得同我一樣咁開心。
我好慶幸有一個咁樣嘅伴侶，包容我，大家會為一件無聊事笑餐飽。自從搞咗個STAR WARS HK會，結集咗一班星戰迷，大家講得最多嘅，除咗珍藏，就係呻屋企人唔鍾意、鬧嘥錢，買番嚟都要入晒箱。我呢？起碼有一個小房間做我嘅私人展館，雖然，觀眾暫時只有我老婆一個，但我已經心滿意足。」
情懷有價 再掀星戰旋風
1977年《星球大戰》首登電影銀幕，掀起熱潮。迪士尼去年宣佈以316億港元收購魯卡斯電影公司，稱會開拍星戰第七、八及九集，R2-D2隨時有機會crossover米奇老鼠！在新的收購計劃下，一系列星戰×Angry Birds的潮物已率先推出，周邊產品有「錢途」，情懷有價！