陳茂波上任發展局長以嚟，爆出劏房、酒駕醜聞，喺問責官員民望包尾。雖然好多人叫佢落台，但係佢都仲「屹立不倒」。
話會瞓身做好份工
噚晚劏房波喺商台節目就話，做人最緊要有自我反省嘅能力，要識得謙虛聽取批評，所以自己都有諗過落台。咁點解仲留低呢？佢話入政府唔係為做官，只係想幫手做事，所以幾經考慮，都係決定繼續瞓身做好份工咁話。
雖然被醜聞纏身唔肯走，但劏房波嚟緊都唔好過，事關除咗新界東北呢場硬仗，施政報告又推多個發展規模更大嘅新界北計劃出嚟，等同向一班八十後宣戰。劏房波就死撐，話年輕人有唔滿意可以理解，因為𠵱家樓價太高喎！乜年輕人最唔滿意，唔係行騙長官梁振英咩？