今年嘅農曆年初一在二月十日星期日，有補假，所以一周五天工作嘅人士放假可以由二月九日星期六（年廿九）放至一月十三日（星期三，年初四），前後五日，夠晒開心。每年到此時候，例必有讀者函電（郵）交馳，要求左丁山講吓一啲團年開年日子。左丁山邊度識吖，不過有高人賞面，徵得有關人士同意之後，可以轉述易學會會長傅沛基老師嘅蛇年資訊，俾大家參考。有關訊息其實早在一星期前嘅「經濟日報」及「晴報」發表，不過在《蘋果》讀者要求下，左丁山又試厚面皮，取得同意後，在此再講一次。
傅會長指示下列日子，舖頭老闆夥計吃尾禡飯在一月廿七日（農曆十二月十六定日好日）；立春在二月四日子時正刻十四分，為閉日，不算好日，如果一定要謝灶，可選用二月二日；大掃除選在二月九日年廿九，呢日大家會好忙，因住手忙腳亂，團年吖嘛（肖龍勿用），晚上五至九時係吉時。
開年，正月初一吉時在午時（十一時半至一時）係好日；年初二係破日，最好避一避；開市，往年年初四要返工，今年年初四係好日噃，偏偏係假期，傅會長話年初四成日係好日，呢日開市可望做生意由年頭旺到年尾，店舖老闆不妨諗一諗，吉時在下午一時半至五時，肖龍者不宜，龍人可選年初六（二月十五日星期五）上午九時半至十一時，年初六不合馬人。如要多放假兩三日，可以等到年初九（二月十八日星期一）上午十一時半至一時先至開工，肖雞者不宜。
蛇年何人犯太歲？傅會長話有四個生肖要留神：（一）蛇犯太歲，（二）豬沖太歲；（三）虎害太歲，（四）猴刑太歲，另外屬羊者在龍年犯太歲，但到了蛇年因全年無吉星照耀（即是有難冇人幫），會幾辛苦，反之蛇有三顆吉星（歲駕、天解、天乙），豬有天廚吉星，虎有天德福星，猴有貴人，代表即使有難，亦有人幫忙照應！至於全年運勢，傅會長指蛇年上半年較辛苦；八月七日後踏入下半年，會一洗頹風，四個較困難月份係農曆正月、四月、七月與十月，至於方位方面，凶位在中間、東南偏南、正東與西南；吉位在西北。凶位不宜動土，吉位可放一隻銀碟以促進財氣。北方亦係吉位，喜慶位在南方。