魔童王維基（Ricky）舊年以50億將親生仔香港寬頻賣畀梁伯韜有份揸旗嘅私募基金CVC，正式同佢一齊打天下嘅一班戰友分道揚鑣，但親生仔始終係親生仔，即使Ricky嘅城市電訊（股東會已通過改名為香港電視）（1137）到家陣都未攞到免費電視牌照，香港寬頻率先表態支持，唔係舉個「十卜」牌出來咁簡單，而係打算現兜兜攞成千萬出來落廣告。
香港寬頻行政總裁楊主光噚日講，佢哋肯定會全力撐Ricky嘅香港電視，仲承諾喺香港電視推出服務第一年，最少落1000萬廣告，應真夠雷！
聽講，香港寬頻同香港電視上月底一齊搞周年晚宴，當Ricky喺台上發言時，楊主光突然攞咗張1000萬大元嘅大支票上台畀Ricky，話要做香港電視嘅第一個廣告客戶。斷估當時全場應該拍爛手掌，唔知出名硬淨嘅Ricky有冇眼泛淚光呢？
楊主光：唔怕重口味
楊主光仲幫王維基賣晒廣告，指舊年喺香港電視節目巡禮上睇過佢哋啲電視劇，覺得好正，好過對手好多𠻹。對於坊間指香港電視嘅劇集好重口味，楊主光即刻護王，指「我哋咪重錘支持囉！」好一個「王粉」！
李華華
mailto:[email protected]