「拖政報告」中，梁振英終於現出真身，登、登、登、凳──佢真正身份係區議員年代的王國興，再加些少黎明。
梁振英的政治水平，其實只有區議員level，今日立法會議員王國興已經叻過CY，區議員年代王國興以訪貧問苦而出名，事無大小均在街邊掛上「成功爭取」banner，向街坊滙報，但政治及政策論述水平有限。
小學雞論述 零具體指標
梁振英之區議員小學雞作風，在於事無大小均當自己功勞，老人乘車優惠乃曾卸任前同各大公共交通機構傾妥，哈，呢條友面皮幾尺厚，竟當自己成功爭取。
成份施政報告正如大輝大師所言，既務虛又務實，真係唔知佢想點。你專注做民生冇問題，但總要在政策方面提供一個論述，包括幾個關鍵問題，如公共資源分配原則、經濟發展與分配問題，一國與兩制矛盾。佢老哥一開始就好似小學EPA課文「香港人勤奮、拼搏、認真，有創業、敬業和法治精神。香港公務員優秀、高效、廉潔；香港司法獨立，治安良好。香港有先進的交通運輸和通訊建設……」聽見火到嚟。
冇水平就係冇水平，論述能力差過王國興，變成一陣蛇齋餅糭味，大家想有屋住，我就狂起屋，所謂願景，應該定出具體指標，而唔係山高水深、山明水秀、可愛城市等虛話。即使要起屋，背後都要有宏觀政策論述。
如果你質佢，佢必定會答你，我已提供宏觀論述，然後引述一大段：
「我們會以點連線：作為國家的國際金融中心和經貿樞紐，香港是點；與其他省市的合作，我們要連線。」
「在高度競爭的國際環境中，停滯就是落後，落後就被淘汰。」
「在取捨和抉擇之間，政府會盡力尋求平衡，但社會不會有百分百的共識，我們不能也不應等待百分百的共識。」
「民生和經濟不可偏廢。改善民生必須靠經濟發展，促進經濟發展就是為了改善民生。」
大家係咪越睇越火滾，呢種黎明式廢噏金句，點可能上得大枱。問你死未？
添馬男