狼英上任半年來，港人不斷高喊「下台」、「大話精」，嗌到聲都沙。立法會新增嘅手語傳譯，就為聲討狼英帶來新意。狼英噚日出席立法會答問大會，泛民繼續叫佢做「大話精」，高叫要佢「下台」，即時手語傳譯嘅姐姐都譯埋出街，所以大家不妨學番兩招，等日後見到狼出沒，都可以用手語向佢作無聲抗議。
用整容傳聞轉移視線
當長毛高呼「大話精下台」時，手語傳譯姐姐都冇自我審查，同一時間譯埋出嚟。「大話精」手語係將左手手背放喺下顎，fing吓啲手指。「下台」又點呢？要兩隻手一齊做，右手做個「6」字手勢，左手攤平五隻手指。狼英煽動人哋向阻住佢施政嘅人高喊「shout at them」，要用手語shout at狼英，原來好簡單，只需將右手呈C字形，放喺張開咗嘅嘴巴旁邊。人力陳偉業批評狼英「欺騙市民」，手語就係左手豎起手指公，右手手板在旁打圈。不過無論講乜、做乜手勢都好，狼英都唔會理你，只識繼續背稿。
噚日有電台主持問狼英會唔會為咗香港人嘅齊心而下台，狼英竟然話會實事求是，同市民討論「事實」問題。事實？事實咪就係你講大話囉。佢仲攞埋自己被懷疑整容嘅傳聞出嚟轉移視線：「大家覺得我做得唔好，說話與事實不符，我會逐一解答，好似有人質疑我整容、割雙眼皮後又唔認，我都可以回答大家。」咁僭建呢？又唔見你講真話！
mailto:[email protected]
齊心一意，打救行騙長官梁振英
http://www.tomonews.net/game/bslapcy/web/