之前提過嘅國產片《泰囧》，內地票房已突破12億人仔，強到無倫。另一邊廂，成龍主演嘅《十二生肖》亦有10億人仔進賬，連同剛剛上畫、王家衛執導嘅《一代宗師》，話內地電影業呢期爆發小陽春絕不為過。至於嚟緊嘅重頭戲，肯定係星爺領軍嘅賀歲片《西遊．降魔篇》，唐牛睇過trailer，3D製作動感十足唔在講，聽女主角舒淇幾句對白，已經feel到星爺放笑彈嘅功力，相信10億人仔票房只係起錶位。
早前推介嘅文化中國（1060），因與星爺有多瓣業務合作，近日喺反覆市下依然企穩，噚日更有破位迹象，可多加留意。不過，講受惠程度，負責《西遊．降魔篇》製作嘅比高（8220）肯定更大。該股月初連續出現4支陽燭，衝上0.218元近一年高位後作出整固，陰陽燭已行至三角形末端，隨着新戲上映期臨近，比高隨時破關而上，戰友有買趁手，以去年高位0.24元作目標，較昨日收市價0.204元有18%升幅。
唐牛