「台灣俠女」伊能靜因為聲援《南方周末》抗河蟹，結果俾國安人員「請飲茶」，事後繼續勇敢發聲，喺微博話：「所有事件，熱度都會消失。夏俊峰案多年未判，家人的心還懸吊着。」
查實夏俊峰係瀋陽小販，2009年刺死兩個城管而被判死刑，覆核超過一年仲未有結果。案件爭論點係夏俊峰係咪自衞殺人，雖然有六個證人指證係城管打人，但統統唔准出庭作證，審訊過程極度黑暗，完全「符合國情」。
呢宗冤案喺強國惹嚟輿論譁然，夏俊峰嘅老婆張晶同現年12歲囝囝夏健強終日奔走申冤，有網友形容係官逼民反，相信夏俊峰無罪。
可憐強強喺學校俾同學叫「殺人犯個仔」，俾人打到腦震盪都唔敢還手，惟有寄情畫畫，希望爸爸早日返屋企。強強嘅畫色彩繽紛，構圖流露對爸爸嘅思念，伊能靜贊助20,000蚊印咗500份月曆送畀網友，希望大家留言鼓勵強強，等佢勇敢面對人生。
嚟緊香港都可以買到強強嘅作品，皆因內地導演胡力夫將夏俊峰故事拍成紀錄片《朝來寒雨晚來風》，今個月26號（周六）喺香港藝術中心agnes b影院放映，佢帶嚟30套強強畫嘅明信片，每套40蚊，本月25號（周五）至27號（周日）喺影院門口義賣，收入捐畀強強家人。
明信片亦可網絡預訂，有心人請電郵到獨立電影節：mailto:[email protected]查詢。