晉佳有一個本地證券行戶口，回想一年半載之前，每次打去客戶服務部問嘢，職員都即時接聽，背後一定係靜蠅蠅，點知前幾日打去就要等一陣，接通後聽到對方啲「Background Music」非常澎湃，真係前所未有，情況有如十幾廿年前打去Call台留Call一樣。睇嚟證券行客戶服務近期相當忙碌，即係代表唔少散戶重新入市吧！
呢一兩個月，有唔少老友、親戚打電話同WhatsApp問冧巴，甚至有老友叫晉佳教佢哋點炒股。睇開本欄嘅讀者都知，晉佳近排已建議投資者逐步轉趨審慎，事實上，喺散戶也瘋狂嘅時候，港股未至於就嚟冧檔，但點都要進入冷靜期，等各路散戶冷靜吓。
一旦港股開始進入冷靜期，投資者其中一個應對嘅好方法，就係逐隻股票到價就食糊，套現嗰筆資金就盡量唔好流番入市場，鎖定利潤，逐步將風險減低。
想贏錢要知進退
除非你係股市高手中嘅高手，喺上落市、跌市都好大機會能夠有斬獲，否則喺中短線不明朗嘅環境下，寧願逐步退市，等低撈機會或再度轉強時至加倉。
近期有位炒期權嘅朋友，由11月中去到1月2日贏足幾個開，佢1月2日同晉佳傾偈時，話贏到自己都唔信。不過，正所謂有糊唔食，罪大惡極，既然賺咗幾倍，晉佳梗係叫佢拿拿臨平倉派彩。結果呢位朋友都好冷靜，聽完勸喻就平倉，直頭將錢過番去股票戶口，務求令自己唔好手痕再炒期權住。之後港股就一直橫行至今，假如呢位朋友繼續炒期權，相信只係輸時間值，都要嘔番啲出嚟。
雖然今次晉佳有份幫朋友成功高位出貨，實在帶點運氣成份，但係故事就告訴各位讀者，識得贏，亦要識得進退有度，市況唔明朗時，進取少幾個月唔使死人，如果次次博到盡，想喪炒幾個月就發達，通常都會變成大鱷點心，到時老早入場贏錢嗰個係你，但最後幫大戶接火棒嗰個都係你，咁就非常之唔抵嘞。
晉佳
本欄逢周一、三及五刊出