啱啱喺市場宣佈抽水逾43億嘅恒大地產（3333）認真闊佬，公關大員噚日喺金鐘一間五星級酒店嘅中菜廳筵開四席，合共請30幾位傳媒朋友食晏，又燕窩、又松茸，真係好捨得使。
一人送一個尿袋
豪請食晏都唔止，恒大仲要一人送一份新年禮物，係一個俗稱「尿袋」嘅智能電話充電器，同一款式嘅尿袋，坊間要賣399大元，唔知恒大係咪大量掃貨有優惠價先至咁大手筆呢？
睇來恒大老闆許家印可能見到舊年賣樓超晒標，預計賣800億（人仔．下同），結果賣到923億，今年更預期賣成千億樓𠻹，既然賣樓收到咁多個零，少少娛樂費又算係乜？不過，股東們應該希望間公司慳啲使，減低負債比率或者派多啲息仲好。