先施（244）好嘢！本欄周一推介，指其以大成交突破，具賣盤或被狙擊的憧憬，股價4日爆升34%，升抵目標價1蚊。執筆之時，公司仍未對股價爆升發出通告，莫非真係好事近？
昨日個市好古惑，二三線大面積洗倉，魏力亦趁機執一執個倉，減持近排喪炒的新能源股，換入三幾隻中型防守股，萬一個市殺落去，都有得頂吓。值得一提是上月平安夜推介的遠東環球（830），唔覺唔覺已飆近五成。呢隻中海系股表現會否如中國建築（3311）、中海宏洋（081）咁勁揪就唔知，但憑其技術及國策扶持，加上母公司源源不絕的定單，要炒高一倍絕對唔難。
炒開股都知，股價預先反映盈利表現，在目前市況，高PE股一般反映未來增長潛力驚人，手機殼股嘉瑞國際（822）就係其中之一。公司主攻Laptop零件壓鑄業務，以及產銷智能手機「暴利殼」。
去年中期毛利率提高3.6個百分點至21.6%，純利飆1.1倍至4162萬元，基數仍然甚低；保守當全年賺9000萬元，預測PE 15倍，睇落唔算平，但股價升極都有，昨又爆一成，收1.57元，破頂在望，目標兩蚊。隨着智能手機普及，今年料為嘉瑞豐收的一年，業務增長澎湃，點止「賣殼」咁簡單！
魏力
http://www.facebook.com/2012jason