【銅鑼灣利園】婚後專心做少奶奶嘅邱淑貞（豆斗），果然係一個賢妻良母，每次出街唔係陪老公沈嘉偉，就係陪三個乖乖女，前日傍晚6點幾，佢就拖住8歲二女沈日行銅鑼灣，佢哋着住灰色母女裝鬼咁溫馨，仲有一個工人跟身齊齊行利園。
逛減價童裝店
沈日雖然冇大家姐沈月咁靚女，但似足爸爸嘅佢生得好可愛。豆斗同沈日上樓去到賣小朋友衫嗰層濕平，估唔到佢哋唔幫襯自家潮店，反而入咗間做緊八折減價嘅童裝店，店員攞咗對白色adidas波鞋畀沈日試，着短褲仔、短髮嘅沈日同外表一樣咁活潑，除定鞋仔嘅佢跳跳紮，不停咁fing腳兼起飛腳，表現得好興奮。
其間豆斗雖然不停講手機，但都好關心囡囡，仲踎低幫乖女睇吓靚唔靚，不過size好似唔啱，店員介紹第二款，兩母女都係對之前試嗰對鞋情有獨鍾，最後豆斗向店員留低資料，似乎等有size返貨通知，跟住兩母女就拖手離去。
採訪、攝影：楊浩賢
【2012年度勁膠金曲頒獎禮】
可能係今年最公正嘅頒獎禮，保證冇內定冇黑幕，快啲去投選你心目中今年最膠嘅歌曲啦！本月20號將揭曉誰是最膠XD
→ http://campaign.appledaily.com/2012awards