港交所（388）正在「班馬」，今個月28號去立法會撐場支持推行夜市期貨！
港交所行政總裁李小加前日洋洋灑灑講咗一堆未來發展藍圖，當中冇乜點樣提到夜期，原來港交所靜雞雞做緊嘢，事關立法會財經事務委員會28號召開特別會議，其中一個議題係討論夜期，文件披露港交所希望證監會批准後，3月可以推行。
反對派林德明將踩場
雖然話港股近期成交旺番晒，但反對推行夜期依然大有人在，證券及期貨從業員工會會長林德明講明，到時會去立法會反對到底。為免只得反對聲音，港交所最近不斷游說支持做夜期嘅券商派人出席，可能係希望畀個機會「沉默的一群」表達聲音啩。
耀才（1428）一直支持港交所加時，CEO陳啟峰證實會現身支持，信誠聯席董事張智威同一通CEO宓光輝都話會到，真係要睇吓邊一邊有道理嘞。