十一月時，本欄講過一群新亞校友重辦新亞文化講座，第一講已在十一月二十四日於土瓜灣天光道/合一道新亞中學禮堂舉行，由吳明林校友講神話，後來聽到籌辦講座嘅校友講，當日聽眾踴躍，除咗約一百名新亞中學學生出席，當係上通識教育課之外，還有其他聽眾近三百人，人數之多，令講者吳明林大感意外。
第二講又嚟嘞，呢次請到嶺南大學政治科學系教授兼系主任王耀宗教授（新亞哲學74）主講「十八大後的中國──政治體制改革往何處去？」，以廣東話主講，時間係一月二十六日星期六下午三時，歡迎公眾聽講，毋用事先登記，免費入場。王耀宗校友近年專注研究中國，2009年出版「神州六十年」一書，中國政治改革，中國現代化，兩岸關係及香港民主發展皆係研究範圍。習近平、李克強即將在三月人大會議後正式主掌國家事務，二人是否進行政治體制改革嘅適當人選，有無決心與意識進行改革，還是決心維護現行體制？聽眾不妨到時問吓王教授。
人大政協兩會三月舉行，港區人大代表已經選出！全國政協代表亦會洗牌。據知情人士講俾左丁山聽，全國政協係一個地位頗高嘅職位，習近平出任中共主席後，好似有啲新風氣，對委任本港人士做政協，會首先要求年滿七十歲人士退下，其次係要已任四屆政協者退下，計一計，可能有四十幾人離任，亦即係話好多人有機會填補，有意做政協者，豈非依家要加緊活動，遊走西環，到北京叩門？知情人士話：「依家先至活動就太遲咯，啲有心人老早做緊嘢，以前做地方政協，省政協，捐錢就有機會，以後唔得嘞，新規定對捐款善長，可頒榮譽市民稱號，但不能憑捐款就做政協！在任政協要考勤，計算開會時嘅發言提案！」咦，咁就唔係幾爽咯噃，聽講以前有政協上到京師，報到註冊後，只出席開幕閉幕禮，其他時間就進行私人活動或飛返香港辦事，呢招以後唔得咯喎！政協既係花瓶，亦係身份，做花瓶都要為大會添幾分光輝，係咁意發揚民主氣氛（鳥籠內民主）嘅，攞咗身份又唔做騷，抵炒啦。