菲菲一向欣賞王家衛，所以已經好快咁睇咗佢套醞釀17年嘅《一代宗師》。正如戲中所講，「念念不忘，必有迴響」，每次回想劇中金句，反覆細味，又會進一步了解箇中含意。
雖然好多人覺得金句好深，不過若由財經角度切入，當中其實蘊含「炒股秘笈」！好似劇中章子怡飾演嘅宮二，就講到「寧可一思進，莫在一思停」，有詩意之餘，當中更隱藏大道理。
正如明明揀啱隻心水股，但落盤㩒「確定」前，硬要諗多陣，結果諗吓諗吓，隻股已經炒咗上去，仲等你咩？記住決定咗買一隻股後，於一思一念間，寧進不停。
劇中又有一句「喜歡人不犯法，可我也只能到喜歡為止了」。人如是，股如是。當愛股已經炒到上天花板，就要識得收放自如，拎得起，放得低，及早止賺，先可以保住一身好武功。
不過，最令菲菲喜歡嘅一句，莫非係「有燈就有人」。冇錯，只要有「明燈」，魚缸先會更吸引人。
Fifi
本欄逢周二、四刊出