噚日CY公佈首份施政報告，港股一度跌近200點，收市都要跌24點。港股表現難睇，一嚟CY自己唔爭氣，公佈一份冇實事嘅施政報告，令市場失望；二嚟又唔好彩，遇正A股因為12月實際使用外資金額下跌4.5%嘅消息拖累，要跟A股插。
睇番紀錄，施政報告每年唔係1月就係10月公佈，今次CY押後至1月才出爐，但內容依然冇料到，恒指跌24點。如果唔計08年上手特首曾蔭權喺金融海嘯期間公佈施政報告當日，恒指急跌5%嘅不正常市況，今次係06年以嚟表現最差，咁如果施政報告日恒指報跌，之後短線又點？
晉佳同事比較過往施政報告日，同兩個星期後港股表現，發現煲呔曾同董伯伯共發表15份施政報告，當中只得4次拖累港股即日下跌，以公佈日前夕恒指收市價計，喺10個交易日之後都要累積錄得跌幅，最多嗰次跌咗5.42%。一句講晒，今次CY認真係開壞咗個頭，如果歷史重現，嚟緊兩個星期港股好難有運行。
小量淡倉對沖正股
至於點解施政報告日嘅大市表現具指標性？乜港股唔係外圍同A股主宰咩？原因係呢日通常係比較利好地產股，事實上，噚日長實（001）同新地（016）升超過1%，唔係靠佢哋頂住嘅話，港股肯定跌多啲。換言之，其他藍籌股底子偏弱，喺高位就快頂唔住個指數。
講開又講，近日港股走勢陰陽怪氣，唔係先升後急回，就係先急跌後回穩，成交越嚟越縮，唔係好兆頭，爆邊應該向下居多。
另外，短線未爆邊之前，就由易炒變得越嚟越難炒，如果呢頭追、嗰頭被震走，反而更傷，所以晉佳維持之前嘅策略──揸實心水股份，加少少淡倉Hedge住就最穩陣，撞正恒指偏軟，仍然有強股造好，分分鐘贏晒兩邊，咁就最爽，如果唔好彩手頭股份跟市跌，都有淡倉頂住，可以做到鎖定利潤效果。
呢一刻Lead住，就梗係持盈保泰啦。
王昇外遊，晉佳代筆