施政報告一出，各界噓聲四起，惟獨是中環精英反應好平靜，因為大家早就心裏有數，不約而同都係講嗰句：「一早就知佢冇料到啦！」海迪估呢句亦係好多發展商的心聲。
自從所謂雙辣招SSD及BSD推出後，樓市的確靜過一陣。但觀乎近日天晉2期熱賣，過千萬元單位火速沽清，就當炒家、大陸客經已絕迹，掃貨嘅全部都係本地用家，即係話你聽香港仲有好多有錢佬，承接力強到你唔信。
芬佬朋友形容，自舊年7月梁振英上台時，大家如夢初醒，知道政府原來冇地，投資者好似開心大發現咁狂掃地產股，自此爆升到今時今日。今次施政報告對他們來講，雖然冇舊年咁「驚喜」，但都再次確認政府已經冇晒計，相信今年一手樓唔需要擔心，即使再無大陸客的premium，樓價唔會急升，但想跌都仲係好難。
今年多盤賣的新地（016）同長實（001），樓盤主要位於偏遠地區，入場門檻冇咁高，相信去貨亦冇問題。芬佬說，資金充裕的長線基金仍會選擇泊錢入地產股，想等樓市調整？喺「一代測量師」梁振英的英明領導下，期票兌現時間相信係「無了期」。
海迪