摩佬發火，皇馬翻生！皇家馬德里周二西盃8強首回合，主場以2:0擊敗華倫西亞，出線形勢大好；不過皇馬教練摩連奴一樣唔收貨，有傳今仗賽後又狂鬧基斯坦奴朗拿度（C朗）。不過正所謂嚴師先出到高徒，我求大俠都贊成治軍從嚴先有好成績，皇馬連續3場冇失波，亦都係今季首次咋！
治軍從嚴成績轉好
皇馬今仗贏波，形勢唔算一面倒；先開紀錄前華倫攻勢仲到肉過主隊，皇馬37分鐘先靠一次反擊，由基迪拉橫傳予賓施馬近門射入領先。華倫未能扳平，都同旁證睇錯有關，倒戈嘅蘇爾達杜兩次突破越位單刀，都被旁證吹罰越位，不過從慢鏡睇，就有枉判之嫌。
華倫越谷越前，73分鐘又畀皇馬一次反擊得手，法比奧干查奧左路傳中，古亞達度情急下擺烏龍，皇馬先贏2:0。不過買咗3:0波膽嘅球迷，就要鬧C朗嘞，事關之後佢有兩次單對單面對門將嘅黃金機會，都一一錯失。
摩連奴呢排火氣好盛，之前雪藏隊長兼首席門將卡斯拿斯，上仗作客奧沙辛拿賽和0:0，據報摩佬指住翼鋒迪馬利亞嚟鬧，大罵佢續約後人工加咗，表現就衰咗；其實摩連奴2010年入主皇馬，該季就即刻引入阿根廷國腳迪馬利亞，兩人又用同一個經理人，摩佬都冇偏私，今仗即刻貶「天使」落後備。而摩連奴同C朗關係更加密切，但摩佬一樣冇面畀，今仗完場後喺更衣室又鬧C朗失機兼唔回防；不過C朗又點會忍得住，向摩佬駁咀，兩人越嘈越勁，要隊友拉開先收聲。「聖卡斯」雪藏完之後就生性，呢3仗打番正選都冇失波；睇吓C朗被摩佬省完後，會唔會之後入番幾粒，定係扭計轉會走人嘞！
皇馬贏波，歐洲足協都贈興，周三公佈2012年歐洲最佳陣容，有530萬人投票，結果皇馬有4將卡斯拿斯、沙治奧拉莫斯、奧斯爾同C朗入選；同巴塞一樣，有美斯、沙維、恩尼斯達同碧基4人入圍，叫做平起平坐啦！而巴塞教練維蘭路華，就覺得皇馬嘅火氣仲未夠，一於火上加油；佢就暗寸摩連奴話：「如果巴塞聯賽落後皇馬18分，我就一早俾球會炒咗啦！」不過維帥可能唔知，皇馬會長佩雷斯唔係唔想炒摩連奴，而係炒摩連奴要賠5,000萬歐元啫。