【中環】近日由內地回流返港拍劇嘅周海媚（海味），前晚9點幾喺中環蘇豪區同一班藝人為無綫新劇集《神槍狙擊》開工，今次配搭都幾新鮮，除咗海味之外仲有張兆輝，楊愛謹（Miki）加埋謝天華。好耐冇見嘅海味睇嚟保養得唔錯，拍住後生女Miki都唔輸蝕。
天華匿埋食煙
一開始拍攝嘅時候就講海味、Miki同張兆輝喺條街行，雖然好簡單咁三個人平排行，但前前後後都行咗成四、五次先收貨。不過最搞笑係鏡頭後，導演一叫「cut」唔止海味同Miki攞個隨身粉盒補粉，連身為男士嘅張兆輝都有自備，就見到佢哋三個人企喺街度補妝。
而未使埋位嘅天華就一於少理，企喺對面馬路不停玩智能電話，差唔多乜嘢功能都俾佢用晒。玩足20分鐘之後。有對母女走嚟同佢合照，佢即刻好合作咁任影。最後到四人一齊埋位，拍咗十零分鐘之後休息，成班大細路開始玩，雖然佢哋係兩代人，但都冇乜隔膜。之後天華行埋一邊食煙，但當有工作人員提醒佢有記者在場嘅時候，佢好識做行到架貨車旁邊遮住食。
採訪、攝影：徐錦池、梁繼光
【齊齊投選2012年娛圈風雲人物】
入面粒粒巨星，你想咀佢，定想掟蕉過去？XD
http://bit.ly/ent_2012 （電腦版）
http://bit.ly/ent_m2012 （手機版）