唔知大家仲有冇印象，2010年一個流落英國嘅乾隆花樽，喺當地一個拍賣會以5.3億港元（連佣6.45億）破紀錄成交，神秘買家係一名內地大款，正當大家哇哇聲之際，原來呢位神秘買家拍完之後冇畀錢，搞到賣家空歡喜一場。
作價2.5至3.1億元
英國《金融時報》噚日報道，呢件乾隆粉彩黃地花卉鏤空開窗游魚瓷瓶，最近透過另一間拍賣行以私人合約形式賣出，傳聞成交價2.5至3.1億港元（2000萬至2500萬英鎊），雖然低過上次嘅紀錄42%至53%，但總算真正賣得出。
呢件古董真係有段古，攞佢出來賣嘅兩兄妹可謂無端端發達，佢哋喺已故父母舊居執嘢時，無意中發現個花樽，收埋喺間屋約70年。
有人估計，呢類古董係清朝時，中國被列強瓜分時伺機搶走，繼而流落歐洲民間。
2010年嗰次拍賣由紀錄成交變成流料之後，2011年開始，中外拍賣行都要求生客落定，定金一般係競投品價值兩成左右，以防再有人搞事或者拍完唔認數。
查實香港1997年樓市高峯期亦有單「黃月鶯事件」，精神病患者黃月鶯聲稱係和黃（013）董事，以8.9億奪得一幅九龍灣地皮，事後梗係冇錢畀啦，事件令到地政總署要修例，要求競投者畀定同登記先可以舉手。
李華華
mailto:[email protected]