Look's Asset Management董事總經理兼投資總監陸東貴為「星級分析員」，向來睇好後市，2013年一開波個市就牛到不得了，啱晒佢合尺，照計佢應該好願意同廣大讀者分享投資心得，但噚日佢出席美聯主辦嘅講座，竟然變成「獲邀參加觀眾only」！
話說美聯呢兩日中午舉辦「2013年樓股爭鋒」講座，噚日嗰場有陸東、美聯兩位高層陳坤興同黃漢成，仲邀請一班記者到場，但噚日早上美聯再發出邀請函，就冇咗陸東個大名，變成三位美聯高層。
去到現場，約200位免費參加講座嘅市民已經坐定定等喺現場嘅陸東開金口，但美聯就派高層喺另一間房招呼記者。要知陸東有乜心得，華華惟有等班陸東粉絲聽完先至可以問番兩句。聽聞佢今次係免費幫美聯講talk，咁限量，唔通陸東密謀搞個收錢嘅talk show？