昨早一心諗住全程追蹤CY嗰份施政報告，但真係頂唔到，佢都未講完序言，我都已經釣緊魚，為免破壞我在同事心目中精力旺盛的形象，還是熄機了事。午後翻閱公關同事為我準備的摘要，心幸沒有蹉跎歲月在這份乏善可陳的環保產物上。
先不說CY在競選期間或再之前，多番標榜自己的雄才大略，治港宏圖，喺呢份報告裏面基本上係無迹可尋，更是無功而返。而兩萬多字的背後訊息和語意解讀，可套用近期大導話題電影的對白：「份嘢，兩個字，一拖一研（延亦可）。」如果這是上任「貪曾」以看守政府心態撰寫的最後功課，情有可原，免得前人請客，後人付鈔。
齋研究唔做事 點收貨
不過家陣首份報告就已經講到跨屆以後，卻避談現行具體政策，點收貨先？況且仲要掩人耳目，拋出一大推研究和諮詢為名，請問政府幾時變咗間學術機構？而口口聲聲話要市民畀時間「行騙長官」做「實」事嘅建制派，睇怕對住咁多嘅學術調研一定感覺興奮充實！
當然更實在的還在開新「局」面，兩個局級機構、三個小組、九個委員會，連幼兒教育都話要研究一番？遲啲應該會有埋「均衡飲食多嚿魚促進委員會」，總之加加埋埋又一大棚（梁）粉人。政治酬庸不在話下，最緊要係分贓得勻，養粉千日，報效一朝。又想起呢啲無關痛癢嘅事項都要大張旗鼓，反之那些意義重大、富爭議性的議題，譬如說反性傾向歧視條例，卻連諮詢討論的餘地也沒有，甚麼「繼續廣泛聽取不同意見」的說法，和這報告一樣，都是「忽悠」，白話即係「老點」。
公屋建量期票 得啖笑
最後總得一提的還有房屋政策，而所謂「重中之重」亦虛有其表，土地供應方面的着墨，固然反映不到CY有勇氣，更唔使講決心從根源着手，對症下藥，解決香港的住屋問題。那張2018年後方可兌現的10萬公屋建量期票，更加係得啖笑。
當年貪曾已經講咗呢五年內已可建成7.5萬個公屋單位，至於CY的競選政綱亦照抄，不過係咁意都話會加快步伐，務求有3.5萬個單位能夠提前一年落成，現咪又係「唔存在」囉。連份內工作都未話做得到，莫講話好，而額外的建量（其實增幅不過爾爾）亦仲要再等多五年，此消彼長，公屋輪候冊名單只怕沒完沒了。到時「社區組織」的民眾方才認清騙徒手法，為時晚矣。
盧先亞