今晚英國波直播3場大戰，但賠率卻表面雞肋，睇波當然希望多波入，但唔少波癡倒希望唔好悶到半程瞓着，甚至戰至加時互射12碼打到日出；重點，推敲車仔迎修頓，兩軍近期俱贏過大魚腩維拉，今次交鋒，取車仔小勝終止主場頹勢，悶悶地贏。
中國人信命信運，所以賭性深重，最喜跟紅頂白，撐旺友專捧淡友對家；但我更欣賞上周英超聯，最深刻一幕，史篤城眾將向連擺兩烏龍嘅地獄黑仔王約拿芬禾達斯雪中送炭，讓他操刀12碼，那管最終被他怒射中楣出界破蛋不成，但「黑仔」終會有反彈嘅一日。從來無敵、防守堅固嘅史篤城竟然主場吞車仔4蛋，幾個入波有睇過都知唔係車仔踢得特勁，正如前仗車仔周中負史雲斯，只因伊雲洛域兩次夢遊。今晚車仔挾大捷迎攻防漸有隊形嘅修咸頓，前者近期除曾大炒維拉8球外，主場實在績劣，其餘5場3和2負更有3場零入球；修頓上仗贏維拉也僅靠插水博到12碼贏1粒，今場似乎唔好期望有好多波入，但卻有博彩價值，決冷敲2.55倍入球「細」。
另一場想博入球「細」係曼聯迎韋斯威，曼聯強勢如巴塞，莊家漸為該隊比賽嘅入球中位數開到3.5球，增加波友贏錢嘅難度；但足總盃唔係費Sir嘅重要目標，上仗都係俾韋斯咸嘅神勇中堅占士哥連斯入兩球，迫出真功夫，開個2:2；今場返主場奧脫福，可以睇定嚟食，尹佩斯屆時如上仗足總盃先列後備，呢個「細」更有信心。
講到唔信命，雲格都算好硬頸，我行我素，笑罵由人，不過今晚重賽再遇剋星史雲斯，若然出局，近8季冇冠幾成定局，冇得顧正進入魔鬼賽程，肯定放手博一鋪；對手真係唔識停，上仗鬥拖肥糖死守博到和局耗力唔太多，今場踢盃賽更唔敢太重注再同呢隻天鵝作對。估計呢場會係全晚直播波中最好睇嘅一場，入球「大」偏熱，不如博個2:1，2:2波膽。（下次見報日期：19/01）
文：蘋果波神