政總搬到添馬艦後，中信大廈海都酒家成為局長、政客飯堂，番書仔財爺鬍鬚曾卻like平民食店，獨愛政總入面嘅canteen；無論係自己開餐抑或請食飯，canteen都係首選，相信係政總canteen大客兼熟客。
同記者吹水夠公開
究竟鬍鬚曾貪canteen有咩好？有曾經同佢喺canteen開餐嘅人士引述鬍鬚曾話：「平平哋，幾好吖」，又話食飯都可以好causal，去啲高級食肆比較拘謹，所以就算佢係高官，都鍾意喺canteen同所有門常開公務員、工程人員、記者等一齊開飯，一個午餐都係幾十蚊，抵到極！
就算佢喺嗰度同記者食飯吹水，都係好公開，冇話要隔開個位，最多揀個僻靜啲嘅角落坐。去到會食乜？如果一班人，鬍鬚曾通常都會叫家常便飯幾味，唔嘴刁，冇乜特別要求。
八方亦發現，每逢星期二行政會議開會期間，唔少司、局長嘅新聞官，都會趁呢個空檔聚首政總canteen，邊食早餐邊開會，或者傾啲八卦嘢。
新上任嘅政制及內地事務局副局長劉江華，噚日朝早亦喺canteen食早餐，同枱仲有新聞處處長黃偉綸、新聞統籌專員鄧惠鈞以及同屬民建聯嘅民政事務局政治助理徐英偉，真係唔知佢哋幾個人咁啱撞到抑或約埋。劉江華話仲適應緊新工作，至於今日發表嘅施政報告，佢預先洩密，話好似冇乜範疇關佢事喎。
mailto:[email protected]