全城等睇CY今日公佈首份施政報告，睇吓會唔會有奇招令到樓價回落，讓市民可以上到車，唔使400萬買個200呎單位，但市場一般估計，政府有乜奇招都好難即刻拉低樓價，豪宅市場更加係企到十分硬淨。
早排聽地產代理講，有位仁兄較市價畀多1000萬，買咗九龍塘喇沙利道碧華花園一個單位，當時以為佢吹水，點知噚日見到土地註冊處資料，碧華花園三座9樓一個1742呎單位，真係以3500萬成交，較同類單位新近成交2500萬足足貴成千萬。
碧華花園有三十幾年樓齡，實用率超過九成，出晒名地方見使，仲要有個41校網，仔女要入名校有優勢，難怪買家出手咁豪爽啦。