有時真係唔太明白梁振英係個乜嘢人，上任至今搞出一鑊粥，但佢在施政報告前夕發表網誌，自吹自擂，話自己施政「有膽有識有目標有規劃有步驟」。佢在房屋政策方面推出一項仆一項，亂搞一通，私樓價格有升冇跌，正正係因為政策冇步驟冇目標冇規劃所致。
半年施政失敗，佢仍夠膽自吹自擂，只有兩個原因：一是為人剛愎自用，死不反省，諉過於人；二是身邊重用梁粉皆是投其所好之擦鞋仔，冇人會作諍友，只會為他開脫。今日梁之算盤當然是瘋狂起屋，將GIC政府用地轉做單幢公屋都諗得出，好明顯已到了不計後果，一於推動民粹式建屋運動，實質上已係八萬五翻版，不惜一切，再起屏風樓、填海、破壞原有規劃，亦要滿足及收買基層巿民。
中產重視核心價值，對梁之胡作非為，心存厭惡，而且對政府福利倚賴程度低，難用政策利益收買，相反兩低一高，即低薪、低學歷、高齡群眾，傾向受建制派蛇齋餅糭收買，立會選舉中有近四成幾選票，就係有呢類群眾支持民建聯，當中不少乃近20年才來香港的新移民，無法晉升為中產，在基層打滾。梁振英在政治上必然要收買基層民心，社區組織協會忽然變成蛇齋餅糭支持者，就係呢個原因，而施麗珊就代表基層表態，十分願意接受蛇齋餅糭來換取核心價值。你話幾悲哀！
五年期票 納稅人埋單
但即使用福利收買人心，亦難推高民望，因為梁之三成幾支持度，就已包括蛇齋餅糭群眾，要民望升，必然要爭取中產，中產講理念、核心價值、民主自由法治，梁振英交唔到貨。更甚者中產亦會計數，佢哋相對交稅最多，公共財政向基層傾斜，開支大增，但收入下降。樓巿淡靜，政府印花稅收入大減，大財團亦拒絕再捐助關愛基金，當錢用光後，未來幾年基金原有資助項目將要由公帑支付，錢從何來？
蛇齋餅糭式施政，毋須政策理性及理念，總之民粹主導，但前提是收入無憂。老董當年一樣，搞到赤字連年，最後要收縮公營開支，削人工減人手，苦不堪言。梁振英五年期票，最終係要納稅人埋單！
添馬男