（哀）曼城中場拿斯尼呢排唔知係唔係睇完《一代宗師》，以為自己葉問上身，周日因為本身有傷兼停賽，冇份參與倒戈阿仙奴嘅英超大戰，結果佢就同法語系舊隊友查馬克行觀眾通道，步入阿聯酋球場。
不過一班好眼利嘅兵工廠球迷認出呢位叛徒，即時圍住佢嚟鬧，球迷越鬧越興奮，爭啲開拖咁滯；好彩已經外借至韋斯咸嘅查馬克，變身做保鑣，阻一阻衝動嘅球迷，先至大事化小咋！
曼城已炒肥仔莊遜
講開保鑣，拿斯尼唔請查馬克，都可以考慮搵前曼城隊友米高莊遜，呢位曾經被譽為天才嘅英格蘭中場，因為長期傷患，場外又事非多多（曾因醉駕被罰停牌），24歲已經成為大肥仔一名。上年聖誕節期間，原來曼城已經決定同周薪4萬鎊嘅米高莊遜解約，不過隨住英國傳媒將佢嘅肥仔相曝光，曼城先公開解約事宜，但就冇講賠咗幾多錢。米高仔既然已經失業，大大件唔打得都睇得，一於轉行做拿斯尼保鑣啦。