住宅樓價唔跌，物業投資市場亦越炒越旺，件件商用物業，無論現樓還是樓花都有大把投資者掃貨，噚日市場傳出，一向有投資物業嘅耀才證券（1428）主席葉茂林再下一城，用1.98億買咗西半山服務式住宅Domus U全幢收租。
搵葉茂林求證，佢第一個反應話「乜你咁快收到料？」諗兩諗又改口風話「只係個零兩個月前去睇過樓，未落實買，未得住㗎」咁係咪遲啲先正式講得呢？
Domus U樓高9層，喺薄扶林道79號，好近港大，「股壇壞孩子」馮永祥旗下禹銘07年用5960萬買入，改裝做有34個單位嘅服務式住宅。雖然單位面積只係410至480呎，但月租1.9萬起，絕對唔相宜。