列納上任QPR領隊後，不斷批評陣中高薪球員打唔出應有水準，除咗新官上任揚威外，亦都向前朝領隊曉士嘅舊臣落定警告，冇表現就會被掃走；率先犧牲品就係中場戴亞，英足盃幫QPR逼和都被解約放走，中堅賴恩尼爾遜亦都搵定後路，準備去美職聯FC多倫多做教練。
不過QPR嘅冗員都仲係掃極都有，葡萄牙右後衞保辛華之前已經扭計，唔想做後備而被QPR重罰10萬鎊，加上曼聯借將法比奧達施華復出，保辛華睇嚟快被逼走。前鋒雷米如順利加盟，將對一班QPR冗員傷兵影響好大，安祖莊臣及森莫亞原本都冇咩嘢，可惜佢哋長傷，對球隊冇建樹。前布力般前鋒凱列特，當然係曉士主要舊臣，列納上任後亦被打入冷宮。中場方面格尼路太多傷患，佢技術型嘅踢法對講實際嘅列納冇咩作用，如馬維拿加盟，呢位前皇馬中場上陣機會一定仲少。