四圍嘅人都覺得QDII2、QFII對港股冇乜用，個市周一只升149點，唔算勁，噚日有上海爭做QDII2試點嘅消息刺激吓，恒指早段曾經破頂，但好快倒跌。晉佳唔知QDII2會唔會有更好消息，但連續嘅好消息都幫唔到港股爆上，睇嚟向上破旗嘅動力唔大，調整又隨時出現，點睇牌面都係麻麻哋。
回顧舊年2月中至3月頭，港股出現中線見頂，橫行半個月就向下隊。港股喺高位橫行得越耐，可能代表派貨需時越長，就越似中線見頂，咁啱得咁橋，港股月初至今亦橫行咗半個月。
展望未來，利好港股嘅內地政策反映得八八九九，外圍好消息就有日本大規模QE，呢方面消息向來甚少對港股構成刺激，至於潛在壞消息，係市場憂慮美國提前加息，同埋中日釣魚島紛爭再度升溫，仲未認真反映出嚟，所以話港股跌千幾二千點，唔係冇可能。
短線博見2.1元
短線港股橫行等爆出個方向之下，大家又唔好太急再減貨，尤其係手揸一批喺恒指橫行嘅時候有機會爆上嘅股份，寧願加小量淡倉Hedge住冇壞，當先鎖定利潤，個股就等跌市開始時，先決定係咪進一步減持。
07年吹港股直通車嗰時，熱炒大折讓H股，大唐發電（991）、中國鋁業（2600）呢啲大價股，一樣可以短時間內爆上一倍，但今時唔同往日，喺A股大跌幾年下，大唐、中鋁已經唔再係大折讓H股。𠵱家仲係大折讓嗰批，一嚟細隻，二嚟老弱殘兵居多，好多都基本因素欠奉，不過，爛股永遠都係爛炒，短線有勢有消息，繼續博你唔信衝上去又唔奇。
當中揀一隻短炒嘅話，晉佳就會睇圖做人，洛陽玻璃（1108）啱啱連升兩日，噚日先以大成交向上突破。如果睇周線圖，舊年年中至今營做緊圓底，成交逐步上升，相信後市都唔會太差，現價細注買入，短線可博上番去年3月高位，即係圓底頸線2.10元，明顯跌穿日線圖保歷加通道中軸1.64元就止蝕。
晉佳
本欄逢周一、三及五刊出