昆士柏流浪（QPR）連續喺兩支倫敦強隊車路士同熱刺身上攞4分，不過仲排喺英超包尾，新任領隊哈利列納護級心切仲有咩法寶？咪就係去做賊，不過佢唔係去偷錢、偷分，而係偷人；QPR突傳出快成功簽入兩名法國兵，其中前鋒雷米，就係喺紐卡素度偷獵返嚟。
祖爾巴頓Twitter攞威
英國傳媒周一先實牙實齒講馬賽前鋒雷米已經到咗英國，同紐卡素簽晒協議準備加盟，點知周二雷米突然轉軚，講佢已經落實加盟QPR，轉會費都係維持800萬鎊（約9,970萬港元）。26歲嘅雷米放棄紐卡素無非都係錢作怪；QPR開出比紐卡素高一倍嘅8萬鎊周薪，點會唔心動。雖然有傳QPR為咗護級失敗做準備，新簽球員都列明如果下季降至英冠，會大幅減人工，不過雷米心諗，就算cut一半都仲係同踢紐卡素睇齊，除笨有精。
而且QPR同馬賽關係都算密切，癲佬中場祖爾巴頓今季就由QPR外借至馬賽；QPR好大機會成功簽下心頭好，巴頓又點會唔喺Twitter攞威：「啱啱聽到好似魔法嘅消息，雷米加盟QPR，列納獲得呢個好禮物，紐卡素到頭來一場空。」馬賽總監艾尼高仲未證實，只講雷米正同數間英超球會傾緊；列納好事成雙，據報佢都好快搞掂雷恩中場馬維拿，轉會費都係800萬鎊。
「老狐狸」列納今次真係一舉兩得，事關本身球隊可擴軍之餘，亦都間接令同樣護級嘅紐卡素增兵計劃受阻；自前鋒丹巴巴亞轉投車仔，紐卡素聯賽就越踢越衰，上仗作客0:0賽和諾域治先止血，但聯賽都只多護級線兩分。
喜鵲轉斟施安迪莊
喜鵲繼中堅高洛仙尼嗌走後，翼鋒賓艾化或者因為同胞唔嚟又扭計，想返法甲加盟巴黎聖日耳門。紐卡素爭唔贏雷米，就轉向荷甲出手，據報想用900萬鎊收購阿積士嘅荷蘭23歲中場施安迪莊，同門將告魯爾一前一後組成荷蘭孖寶，為護級而戰。