王祖藍有份寫劇本嘅無綫劇《老表，你好嘢！》未播已引起大眾注意，個劇好多內容講中港同胞嘅關係，果然前日首集出街即惹嚟議論紛紛，有人覺得個劇講和諧包容，亦有人覺得係曲線踩內地人，尤其講啲內地遊客帶大叠人民幣購物，中港兩地同胞嗌交又提番內地人隨街大小便咁，就連唱蝗蟲歌寸內地人都有埋。
谷收視接投訴
不過唔好理係和諧定曲線踩，總之都達到谷收視效果，首日收視平均31點，即有199萬人睇，成績唔錯，無綫方面冇收到投訴，但通訊事務管理局就收到十宗投訴，指劇情誤導觀眾、加大中港矛盾、抄襲歌曲同內容譁眾取寵等。
劇中演員王祖藍、萬綺雯、郭晉安及王菀之等，前晚就喺佐敦食飯齊齊睇首播，對於首套劇喺無綫出街，萬綺雯就話太多人問佢，由原本唔緊張都搞到開始緊張，講到佢老公陳十三被指煙癮大影響生育，佢強調兩公婆身體冇問題，生唔生有好多原因。
撰文：馮仁昭
【齊齊投選2012年娛圈風雲人物】
入面粒粒巨星，你想咀佢，定想掟蕉過去？XD
http://bit.ly/ent_2012 （電腦版）
http://bit.ly/ent_m2012 （手機版）