中原地產貼出「非本地客好消息」標語，宣傳有大量一、二手連公司出售的住宅單位，海外買家可省百分之十五買家印花稅，被網民鬧爆為「香港人渣」、「出賣香港」等等，沙膽虹睇完，真係替中原不值，大佬呀，中原地產又冇犯法，咁都要鬧？政府苛稅，全世界都會想盡辦法省稅，只要不是瞞騙，合法省稅有甚麼不對？作為自由市場經濟的支持者，沙膽虹絕對唔贊成政府亂用徵稅手段；市民千方百計省稅，冇謂磅水槽肥大政府，有甚麼唔妥？
其實，政府實施買家印花稅後，這些用空殼公司持有的住宅單位，馬上變成筍盤唔憂嫁，業主當然不願意以市價放售，希望有半成至一成售價吸引非本地客，一家便宜兩家着。中原作為地產代理，為業主客戶以較高價放售單位，乃正常生意手法。香港素來都是自由經濟體，政府的不斷干預和胡亂苛稅已令香港自由經濟評分降低，如今商人的正常買賣手法更遭網民冠以「出賣香港」、「欺騙稅局，罪成真係要坐牢」等莫須有罪名，沙膽虹睇到這段新聞，仲以為自己唔係身處香港。
沙膽虹