阿里巴巴集團Icon馬雲49歲就退下火線，噚日宣佈今年5月10號起唔再做CEO，只做主席，揚言「做自己開心，做自己能做的，配合好比我強的人的工作」。睇唔出馬雲外型瘦削，胸襟如此廣闊！
5月10號有新繼任人
馬雲講明係提早幾個月話唔做，等幾位有能力嘅年輕人行出來，總之5月10號一定有繼任人。佢又透露，大部份六十後嘅高層今年都會退出管理執行角色，交由七十後、八十後負責，相信佢哋「更懂未來」。
事實上，電子網絡世界真係越行越快，舉個就近例子，好多廿幾卅歲以上嘅人對於HMV申請破產保護感到相當驚訝同可惜，但其實N年前嘅美國青春偶像劇，主角已經用iPod喺房播歌，CD機喺呢班細路心目中可能係古董，唱片舖老闆早就應該預示到遲早要轉型。