咖哩牛腩，有辣有唔辣。牽牛同咖喱將總結每周球賽，見到抵讚嘅事，牽牛定必重重有賞，用幾百字大讚吓佢；但見到抵鬧嘅人，咖喱就會毫不留情，省佢一餐。
上星期牽牛用《寒戰》為專欄軸心，今星期小弟就用《王的盛宴》帶起，睇吓車路士嘅權力鬥爭。《王的盛宴》係由劉邦回顧佢嘅一生，講番佢同項羽、韓信打天下嘅故事。歷史會不斷重演，而且無分國界；其實劉邦誅殺韓信嘅事喺今日嘅車仔都發生緊。
邊個係車仔劉邦？當然係阿巴莫域治。佢接掌車仔後嘅目標就係打天下，贏英超同歐聯。為了呢個目標，佢可以畀隊波打醜陋足球，重體能而輕技術，結果阿巴喺舊年達成目標。打完天下就要治天下，亦係阿巴要開始實踐佢漂亮足球嘅理念，而佢最大嘅阻力可能就係一班幫佢用體力打天下嘅猛將。
杜奧巴可以話係車仔張良，話佢識得急流勇退，喺高峯期退下，唔使勞動阿巴出手。施治就係車仔蕭何，默默地保住後方，唔會搶走阿巴風頭，加上門將同球隊風格關係唔大，相信佢長撈長有。泰利、林柏特同艾殊利高爾可以話係車仔嘅韓信、英布同彭越。呢3位漢初猛將打得，有兵權，仲要分封做王；佢哋同車仔嘅泰利3人嘅地位相似，同樣戰功纍纍，控制住更衣室。
當阿巴見到佢哋3個上年夾埋整走波亞斯之後，相信都對佢哋起咗戒心，因為波亞斯係由阿巴親自挑選，可以話阿巴權力嘅伸延，而佢哋嘅行為係等於直接挑戰阿巴。阿巴就好似劉邦咁忍，忍到攞埋歐聯，就要清走呢班更衣室大佬。不過，劉邦清剿功臣後，漢室要經過七王之亂同文景之治後，先至出現漢武帝嘅盛世，希望阿巴明白成功係需要時間，畀啲耐性新領隊同啲年輕球員。
文：咖喱