梁振英政府強推政策時懶理諮詢，惹來民怨載道。近日政府建議將軍澳─藍田隧道通過茶果嶺村中央，又提出把茶果嶺高嶺土石礦場連山墳土地興建住宅，令茶果嶺村面臨「劏村」及「拆墳建屋」兩大劫數。九代植根於茶果嶺的茶果嶺鄉民聯誼會首總理邱東表示，有關計劃令其家園被毀及200年祖墳被拆，如政府一意孤行，「恐怕有流血事件發生」！ 記者：吳淑義
「我叫邱東，今年67歲，老太公喺清朝，即300年前已經住喺茶果嶺村，我係第七代，仲有三個仔女同四個孫，即係九代人都住呢條村。家族係村內地主，我住緊間屋有3,000幾呎，住咗大約10個人，另外仲有10幾間房同10幾間屋收租，有啲喺度住咗幾代，我好體貼啲租客，收番買餸錢就算，一間屋都係收幾百蚊租，唔捨得加租。
我好鍾意呢條村，細路時對住個海，可以摸蜆捉蟹叉魚，淨係玩海都有排玩。印象最深刻係每年天后誕，非常喜慶，有舞獅舞龍飄色巡遊，仲做大戲，所有喺外國嘅同村姊妹都返嚟。
祖墳風水保全家
呢度整體治安好好，只有少數癮君子偷雞摸鴨，而1940年代，政府派咗十幾枝槍畀我哋茶果嶺自衞隊，因為嗰時冇警力，靠我哋自己去維持治安，自此冇人敢嚟犯案，直到六、七十年代，政府就逐家去收番啲槍。
我太公係佳利石礦場公司嘅大股東，當年負責開採高嶺土礦場，掘出嘅花崗岩原先交去西環碼頭同雞籠環起石壆，後來就用嚟起舊立法會大樓，仲有虎門炮台、廣州騎樓石料，連廣州一德路天主堂都係用呢度嘅石。當年石材要人手鑿出嚟，我哋請咗600幾個工人，佢哋每年返鄉下兩次，當年治安唔好，沿途要有人押糧，即係由鑣師陀匕首保護佢哋返鄉下。
眼前呢座墳有200幾年歷史，係第二代大太公親手做畀孫仔嘅，全部石係就地取材，呢度風水名叫『絲線吊金鐘』，因為位置向正金鐘兵房，以前海軍總部。起咗祖墳之後家族安逸又平穩，子孫個個搵到食，個個讀到書。
「連假諮詢都冇」
我後生時做建築判頭，𠵱家退咗休，仔女學有所成做其他行業。政府話要喺高嶺土起屋，但完全冇諮詢過村民，有個祖墳喺度，但係連假諮詢都冇做過。官地還官地，睇邊個嚟先囉，我先過你㗎，否則點解有私家地？我哋（原居民）有殯葬權喎，可以畜牧，可以上嚟斬樹燒柴，呢啲係我哋原居民利益，要坐底慢慢講，唔係問都唔問就拆墳。
我哋幾代人住喺度，真正吾鄉吾土濃情，呢個祖墳足以影響我嘅家族嘅平安，錢好閒，最緊要保到平安，最好唔好拆。如果政府一意孤行，我哋不惜任何代價，或者發生流血事件都有㗎。
將藍隧道對茶果嶺村影響最多，又係冇諮詢，佢喺我後面開工，我啲家人俾佢搞得慘呀，間屋俾佢拆梗，連根都掹起，即係趕盡殺絕，冇辦法啦，官逼民反呀。」
起將藍隧道 茶果嶺村遭一刀兩斷
「高嶺土石礦場係咪一定要起樓？有冇其他更可行方案？點解之前冇諮詢，又冇人同村民傾？」茶果嶺鄉民聯誼會總理關先生表示，政府擬在茶果嶺村大興土木，惹來村民強烈反彈，上周二觀塘區議會開會討論時，逾600名村民到場抗議。
關先生認為茶果嶺靠近郵輪碼頭，有條件發展旅遊項目，「遊客去鯉魚門食完海鮮，可以去天后廟同多仔石，唔一定要起樓」。
古墳申請古蹟文物
村內的邱氏古墳已有200多年歷史，村民數月前已研究是否有條件列作古蹟文物，「今次事件促進咗申請，未來一兩個月會諮詢專業意見」。
政府擬興建將軍澳─藍田隧道時在茶果嶺村中央通過，形同「劏村」，關先生指逾九成村民反對方案，但有關意見在政府報告中「被失蹤」，「風水角度嚟講，條路中間過係一刀兩斷，等於村毀人亡，村民當然會反對。」
關先生聲稱村民是支持政府發展，又指特首梁振英參選前曾探訪過茶果嶺村，聽取村民對重建方案的意見，但村內寮屋太多，暫未有任何定案。目前村民希望政府能作全面諮詢，避免強推「劏村」方案。