啱啱喺無綫攞咗個傑出演員獎嘅許紹雄（Benz雄），噚日喺黃埔新城接受訪問，講起無綫易主前後，佢突然有感而發，直言指方逸華年代待遇唔好：「梁博士（梁乃鵬）搞盆菜宴，其實佢早幾年已經想搞，任何一間公司都有三種人，有做嘢嘅人，唔做嘢嘅人，同埋阻住做嘢嘅人，佢就係俾人阻住，但乜嘢原因佢先知，但係一轉新老闆即刻搞，咁大家就知啦。」
拍姦戲有心冇力
Benz雄又提到好多年前過年，藝員會有五千幾蚊嘅大利是，佢話：「佢哋職員有雙糧，我哋唔係人嚟咩？我哋又唔係職員咩？咪當利是畀，不過停咗好耐啦，自從方小姐話事停咗，佢走咗先聽聞開始有番，如果佢再唔走，執㖭呀，好似邵氏咁有乜出奇，萎縮囉，以前有台慶飯食又冇埋。」
另外，講到無綫嘅劇集呢排大灑鹽花有好多強姦戲，Benz雄話係編排問題，有乜理由安排同一時間出街，問佢想唔想做強人嗰個？Benz雄笑話：「真嘅都唔得，何況係姦，有心冇力呀，呢啲戲好難做，我怕尷尬。」
撰文：馮仁昭
【2012年度勁膠金曲頒獎禮】
可能係今年最公正嘅頒獎禮，保證冇內定冇黑幕，快啲去投選你心目中今年最膠嘅歌曲啦！本月20號將揭曉誰是最膠XD
→ http://campaign.appledaily.com/2012awards